Kuri uyu wa Gatandatu tariki 06 Nzeri 2020, Minisitiri w’Ubucuruzi n’Inganda “MINICOM”, Hakuziyaremye Soraya yasuye inzu y’ubucuruzi ya CHIC muri gahunda y’ubukangurambaga mu kwirinda COVID-19, iyi akaba ari gahunda irimo gukorwa n’abagize Guverinoma.
Minisitiri Soraya Hakuziyaremye yaganiriye n’abacuruzi ndetse n’ubuyobozi bwa CHIC ku ngamba zitandukanye zo kwirinda COVID-19 aho yabasabye ubufatanye kugira ngo ibikorwa bikomeze.
Nyuma yo gutambagira ibice bitandukanye by’iyi nzu y’ubucuruzi areba uko amabwiriza yo kwirinda COVID19 ashyirwa mu bikorwa, Minisitiri Soraya Hakuziyaremye yasabye abakorera muri iyi nyubako gushyira amabwiriza y’ubwirinzi ku mitima yabo ndetse bakanayakangurira abaje babagana kugira ngo bose bafatanye mu kwirinda icyorezo cya COVID-19.
Yakomeje ababwira ko hagize urwara muri bo bishobora gutuma ubucuruzi bw’abahakorera bose buhagarara kandi ntawe ubyifuza, akaba ariyo mpavu buri wese uhakorera akwiye kumva ko ari ngombwa ko agira uruhare mu kwirinda no kurinda umuntu wese uhaza.
Minisitiri w’Ubucuruzi n’Inganda yasabye abakorera muri CHIC kubahiriza amabwiriza yo kutarenza 50% y’abakorera mu byumba by’ ubucuruzi, gukora bibuka guhana intera ya metero imwe, bagahora bambaye agapfukamunwa kandi bagakaraba intoki. Aha yongeye gusaba ko buri mucuruzi akwiye kuba afite uburyo bwo bufasha abamugana gukaraba neza intoki.
Ibi bikorwa by’ubukangurambaga muri Kigali birimo gukorwa mu gihe kuva tariki 27 Kanama 2020, hahagaritswe ingendo rusange zihuza uyu mujyi n’intara zose nyuma y’aho imibare y’abanduye COVID-19 yari yazamutse bitewe n’abanduye babonetse ahakorerwa ubucuruzi harimo isoko rya Nyarugenge ndetse n’isoko rya Nyabugogo ahazwi nko kwa Mutangana.
NIYONZIMA Theogene
